قاعدين فى البيت بقالنا كتير وحياتنا محتاجة تغير
الشارع زحمة زحمة وطوابير نفسى اخلع مالدوشة واطير
الميكروباصات زى المجانين تكسر علينا من الشمال واليمين
وفنص الشارع راكنين ويقاوح .. اومال اروح فين؟؟
ياعم عمتنا بدخانك شوفلك بقى حل فى شكمانك
انت لسه واقف مكانك قوم يلا وغنى معانا
لازم بكرة هيبقى احلى لو غيرنا شوية حياتنا
التغيير ده حاجة سهلة لو ركزنا وانجزنا
من الصبح فى مشاوير وبقالنا كتير ماشييين
عينا جت على قهوة لقينا ناس كتير قاعدين
قولنا نقعد نشرب حاجة بدل مااحنا عطشانين
لقينا كل الناس باصين متنحيين
بيتفرجوا عالدش وبيلعبوا طاولة ومبسوطين
قولنالهم انتو مينقالولنا احنا الفاضيين
بيوتنا زحمة واحنا منها هاربنين كان نفسنا نعمل حاجة بس مش عارفين
يمكن عشان انتم مش مركزين وفى الدنيا تايهين ومطنشين
هتفضل قاعد كده وتعدى عليك السنين
لازم تحسبها صح وتفكر تفكر سليم
لازم بكرة هيبقى احلى لو غيرنا شوية حياتنا
التغيير ده حاجة سهلة لو ركزنا وانجزنا
تانى مشيين فالشارع بعد زحمة المرور
جنبنا مدرسة عيال بينطوا من على السور كلهم زوغوا بعد الطابور
ومحدش فارقة معاه الغياب والحضور
والمدرسين والناظر كمان عصيانهم اشكال والوان
اللى غايب عندو زكام واللى تعب فى الفصل ومات
وسالت نفسى العيب عيب مين الطلبه ولا المدرسين
وعالعموم ادينا ماشيين الف بيه ته ثه جيم
لازم بكرة هيبقى احلى لو غيرنا شوية حياتنا
التغيير ده حاجة سهلة لو ركزنا وانجزنا
محروس كان عايز يخف جنابه لما ركنا عند حلاقه
ناس كتير واقفين على بابه اتاريه عامل انقلابو
بيحلق لتلاته بنفس الموس فنفس الوقت يوفر فلوس
(ده غير انه بينقل فيرس.. انا محلقتش انا محظوظ)
ايه ياعم اللى انت بتعملوا
انت مش عارف اللى انت بتنقلو
وانتو ساكتين مش بتتكلموا مش ناويين بقى تتعلموا وتتقدموا
لازم بكرة هيبقى احلى لو غيرنا شوية حياتنا
التغيير ده حاجة سهلة لو ركزنا وانجزنا
تايهين فى الشارع مفيش حد حوالينا فجأة لقينا فرح جنبينا
بصينا على الكوشة اتخضينا مش مش مصدقيين اللى شايفاه عنينا
يالف نهار ابيض يالف نهار مبروك
ابو العروسه مجوز بنتو لواحد قد ابوها
والبنت فى الاعدادية وكان نفسها تخش حقوق
طب وذنبو ايه المولود اللى هيجبوه
انت بتفكر تفكير قديم لازم تدى للبنت فرصة زى الولد فى التعليم
لما تكبر يمكن تقدر تعمل انجاز عظيم
موضوع: لازم بكرة (MTM) 
الإثنين مايو 12, 2008 2:32 am
